अता फिरूनी ...

व्यथा माझी कथा माझी
तुझ्या बाहूंत संपावी
फुले काही कळ्या काही
चिता माझी सुगंधावी ...

तुझे आकाश ता-यांनी
असे बहरून आलेले
पुन्हा ही कोर अन् खाली
जरा क्षितिजा लवंडावी ...

तुला मी साद घालू का
तुला उमजेल हे सारे
तुला स्मरण्यात केवळ
का इथे ही रात्र रंगावी ?

जुने काही नवे काही
उखाणे तूच घालावे
तुझ्या माझ्यातली कूटे
क्षणी एकाच भंगावी ...

असे जगणे असे झुरणे
कितीदा अन् रिते उरणे
तुझ्या माझ्यातली दुनिया
अता फिरूनी अभंगावी ...