अस्ताई

अस्ताच्या वेळी वाटे

का इथे असा उरलेला

हा एक दिवा विझणारा

हृदयाशी मिणमिणणारा ?

अस्ताच्या वेळी माझा

होतो अन रोजच अस्त

तिमिराच्या दुलईसाठी

मी रोजच आतुरलेला !

अस्ताच्या वेळेसाठी

कुणी घेतो रोजच जन्म

हे डोळे मिटण्यासाठी

हा जन्मच आसुसलेला ||

अस्ताला जाते बिंब

मी तसाच येथे उरतो

मी प्राण शोधतो येथे

सावलीसवे सरलेला ||

अस्ताच्या वेळी माझे

अस्ताला जाणे यावे

अस्ताई संपून गाणे

अंतरा म्हणू लागावे ||