पावसा पावसा । पड रे झड रे ।
कुठे काही कोरे । ठेवू नको ॥
पावसा पावसा । असाच पडून ।
धरणे भरून । जाई आता ॥
पावसा पावसा । आण आत्ता वात ।
विजेची कपात । नको पुढे ॥
पावसा पावसा । पीकपाणी येवो ।
महागाई राहो । मर्यादेत ॥
पावसा पावसा । घरात डांबून ।
कैद करवून । ठेवतोसि ॥
पावसा पावसा । सतत पडशी ।
आवाजाने तशी । झोप नाही ॥
पावसा पावसा । पोरांची चंगळ ।
भिजूनि बक्कळ । खेळताति ॥
पावसा पावसा । जावे कोठे आता ?
सर्वत्र जनता । थिजलेली ||
पावसा पावसा । ट्रॅफिक मुरांबे ।
सर्दी नाका झोंबे । सर्वांलागी ॥
पावसा पावसा । ट्रेन बंद करी ।
रजा कारभारी । घेता येते ॥
पावसा पावसा । रेनकोटा आत ।
धारा शिरतात । गारेगार ॥
पावसा भिंतींचे । वॉटर प्रूफिंग ।
असते महाग । भेदू नको ॥
पावसा पावसा । गॅलरीत माझ्या ।
शेवाळाचा साचा । झाला असे ॥
पावसा शरण । वॉशिंग मशिन ।
ड्रायिंगची सोय । नाही आता ॥
पावसा पावसा । एव्हढेच पुरे ।
थांब की नंतरे | लगोलग |
पावसा पावसा | तुझे कवतिक |
एव्हढेचि देख | आम्हा आता ||
No comments:
Post a Comment