सुराज्य !

राजकारणाचे | नवे नवे रंग |

सुराज्याचे भंग | स्वप्न सारे || 

सत्तेच्या आसनी | चाललासे खेळ |

सारा बट्याबोळ | लोक-शाही ||

भ्रष्टाचार मोठे | नेत्यांचे खुशाल |

जनतेचे हाल | साहजिक ||

एकाला बोचावी | दुज्याची ताकद |

कोणी ना वाकत | कोणापुढे ||

देतो राजीनामा | एकाने म्हणावे |

दुज्यानी म्हणावे | मागे घ्या हो ||

किंवा मग जोर | तिज्यानी करावा |

आसनास द्यावा | पाठिंबाच ||

कोलांट उड्यांची | कसरत मोठी |

अशी करणारी | माकडे ही ||

साधतात नित्य | गणित पैश्याचे |

मुळी ना तत्वांचे | बांधील हे ||

खातात मिळूनी | अजीर्ण होईतो |

एखादा तोडतो | भागीदारी ||

मुदतीच्या आधी | निवडणुकीचे |

भय दावण्याचे | एकमेका ||

तुझे तू सांभाळ | झाकुनिया माझे |

असे नित्य यांचे | चाललेले ||

यामध्ये दुरावा | तो ही व्यवहार |

नसतो प्रहार | खराखुरा ||

सत्तेचा व्यापार | करती हे सारे |

आम्ही बघणारे | नपुंसक ||

कधी या विघ्नांचा | नाश व्हावयाचा ?

माणूस - माणूस | व्हावा कधी ?