हायवे

या हायवेला पूर येतो
वेगाचा
विजिगिषेचा
माणसांच्या ऐहिक स्वप्नांचा
या देशाच्या
प्रगतीचे म्हणून जे जे
आलेख काढले जातात
त्यामध्ये हा पूर प्रकटतो
वेगवेगळ्या रेघा, स्तंभ आणि आलेखांच्या
सुबक रूपांमध्ये
मात्र
त्यात कुठेही दिसत अथवा
प्रकटत नाहीत
या हायवेवर
नित्यनियमाने
प्रकटणाऱ्या
मृत प्राण्यांच्या रक्ताच्या चिळकांड्या
लाल रंगाचे हे आलेख
फक्त हायवेवरचे जागृत प्रवासी
पाहू शकतात
एखाद्या
देशाच्या प्रगतीत तसंही
वेगपुढे मरणाऱ्यांना
स्थानच कुठे असतं ?
हायवेवर, हायवेच्या बाजूच्या जमिनीत
असंख्य
खिजगणतीत
नसलेल्या देहांच्या
चामड्याची निशाणं
फडकतात
प्रगतीचा झेंडा आणखी आणखी
उंचावत नेणाऱ्या
भरधाव वाहनांच्या वाऱ्यावर !